യാത്ര

deepusai thaththappally

ഒരു നീർത്തുള്ളി മാത്രമെൻ മിഴിയിൽ
ഓർമ്മത്താളുകളിലൊരു മഴപ്പെയ്ത്തിനായ്‌
ഒരു നിശ്ശബ്ദസങ്കീർത്തനമെൻ നിനവിൽ,
ഭഗ്ന സ്വപ്നങ്ങൾക്കു താരാട്ടായ്‌
നനുത്ത സ്പർശമെൻ വിരൽത്തുമ്പിൽ,
പറയാൻമറന്ന പ്രണയത്തെ തലോടിയുണർത്താൻ
ഒരു രക്തത്തുള്ളിമാത്രമെൻ സിരകളിൽ
കൈക്കുടന്നയിലൂടൂർന്നു പോയൊരെൻ;
ജീവിതത്തിൻ, തർപ്പണത്തിനായ്‌...
കാത്തിരുന്നു, ഞാനീയിരുട്ടിൽ സൂര്യശിഖരത്തിൻ,
കരുണവറ്റാത്ത വെളിച്ചക്കൈകളെ
വന്നതില്ലാരുമെൻ കിനാക്കളെ പങ്കിട്ടെടുക്കുവാൻ
തന്നതോ, ശാപവചനങ്ങൾ തൻ പേമാരി മാത്രം!
ചോരമണക്കുന്ന...
കണ്ണീരുണങ്ങാത്ത വിജനവീഥിയിലൂടെ;
ശിഷ്ടസ്വപ്നങ്ങളുടെ പാഥേയവുമായി
ഏകാന്ത പഥികനായി,
ആർക്കോ, എപ്പോഴോ നഷ്ടമായ
കിനാത്തുണ്ടുകളും പെറുക്കിയെടുത്ത്‌
അസ്ഥിക്കുടുക്കയിൽ അസ്തമിക്കാത്ത പ്രതീക്ഷകളുമായി
തുടരട്ടെ; ഞാനെൻ മോക്ഷയാത്ര....!